42% బీసీ రిజర్వేషన్లు అమలు చేయాలి: ఆర్. కృష్ణయ్య

తెలంగాణ రాష్ట్రంలో త్వరలో జరగనున్న జడ్పీటీసీ, ఎంపీటీసీ ఎన్నికలను 42 శాతం బీసీ రిజర్వేషన్లతోనే నిర్వహించాలని రాజ్యసభ సభ్యులు, బీసీ సంక్షేమ సంఘం జాతీయ అధ్యక్షుడు ఆర్. కృష్ణయ్య డిమాండ్ చేశారు. ఈ మేరకు ఆయన ముఖ్యమంత్రి రేవంత్ రెడ్డికి ఒక లేఖ రాశారు. అనంతరం హైదరాబాద్ విద్యానగర్‌లోని బీసీ భవన్‌లో ఏర్పాటు చేసిన విలేకరుల సమావేశంలో మాట్లాడారు.

సీఎం రేవంత్ రెడ్డి బీసీ వ్యతిరేక వైఖరిని మార్చుకోవాలని కృష్ణయ్య హితవు పలికారు. కాంగ్రెస్ పార్టీ తన ఎన్నికల వాగ్దానానికి కట్టుబడి, 42 శాతం రిజర్వేషన్లను అమలు చేసిన తర్వాతే స్థానిక సంస్థల ఎన్నికలకు వెళ్లాలని సూచించారు. ఈ రిజర్వేషన్ల అంశంపై కోర్టులో ఉన్న స్టేను ఎత్తివేసేందుకు ప్రభుత్వం తక్షణమే చర్యలు తీసుకోవాలని ఆయన కోరారు.

గతంలో ప్రభుత్వం బీసీలను అణచివేసే ప్రయత్నం చేసినప్పటికీ, వారి సత్తా ఏంటో ఎన్నికల్లో నిరూపించుకున్నారని గుర్తుచేశారు. పంచాయతీ ఎన్నికలలో 53 శాతం, మున్సిపల్ ఎన్నికలలో 68 శాతం మంది బీసీలు గెలిచారని గణాంకాలతో వివరించారు. ఇచ్చిన హామీ ప్రకారం రిజర్వేషన్లు అమలు చేయకుండా ఎన్నికలు నిర్వహిస్తే బీసీ సంఘాల నుంచి తీవ్ర ప్రతిఘటన తప్పదని హెచ్చరించారు.